ዶክተር ኣሉላ መረሳ ተኽሉ ኣብ ትግራይ፣ ከተማ ዓድዋ፣ ኩሎም ቈልዑ ሰፈር፣ ብሓልዮት ጐረባብትን ዓበይቲ ዓዲን እናተኣለዩን እናተገንሑን ዝዓብዩሉ ኣብ ዝነበረሉ እዋን ተወሊዶም፣ ኣብ ሕቝፊ ኣቦሓጎታቶም፣ ወለዶም፣ ኣሓቶምን ኣሕዋቶምን፣ ጐረባብቶምን ማሕበረሰቦምን፣ ምቁር እዋን ቍልዕነቶም ዘሕለፉ ሓኪምን ተመራማሪ ሥነ-ጥዕና ማሕበረሰብን እዮም። ክልተ ደቆም ዓብየን ነበረያ ነበረ ንኸዘንትዉለን ደጋጊመን ምሕታት ምስጀመራ፣ ካብ እዋን ቍልዕነቶም ጀሚሩ ተዓቚሩ ዝፀንሐ ተዘክሮ፣ ኣተዓባብያኦም ዘሕደረሎም ፅልዋን ምስ እቲ ብዙሕ ከየስተብሃልሉ ኣብ ውሽጦም ተቐቢሩ ዝፀንሐ ህያብ ክእለት ምፅሓፍ ዝተዓደሉዎም ኩሎም ፀጋታት ኣወሃሂዶም መፃሕፍቲ ኣብ ምድላው ክጥቀሙሎም ጀመሩ። እዚ ፀጋታት ዶክተር ኣሉላ ናብ ዓብዪ ራእይ ተቐይሩ፣ "ኣያይ" ብዝብል ስያመ ዝፍለጥ ዓብዪ ኩባንያ ብምጥያሽ ነቲ ትካል ብሓላፍነት እናመርሑ ይርከቡ። ዕላማ ኩባንያ "ኣያይ"፣ ፈቖድኡ ቁሸታትን ጣብያታትን ዕድል ስኢኖም ተቐቢሮም ንዝርከቡ ምቁራት ዛንታታትን ትውፊታትን ኣፍሪቃ መድረኽ ኣዳልዩ፣ ብሰፊሑ ተዘርጊሖም ብመልክዓት መፃሕፍቲ፣ ተንቀሳቓሲ ምስሊ (ፊልሚ፣ ኣኒመሽን፣ ካርቱን) . . . ተዳልዮም ከዘናግዑ፣ ከምህሩ፣ ታሪኽ ክነግሩ፣ ክምዕዱ ዕድል ምፍጣር እዩ። እዚ መድረኽ ዝኾነ ይኹን ሓሳብ ንዘለዎም ሰባት፣ ሓሳባቶም ዝገልፁሉ ባይታ ዝፈጥር ጥራይ ዘይኮነስ ካብ ዓዶም ወፃኢ ንዝነብሩ ደቂ ስድራ ኣፍሪቃውያን ክረምታዊ ዑደት ዘጠዓዕም እዩ።